45 Ang akon tagipusoon nagahambal sang isa ka maayo nga butang: nagahambal ako nahanungod sa mga butang nga akon ginhimo nahanungod sa hari: ang akon dila amo ang pluma sang isa ka handa nga manunulat.
2 Matahom ka pa sa mga anak sang mga tawo: ang grasya ginabubo sa imo mga bibig: busa ang Dios nagpakamaayo sa imo sa gihapon.
3 Iwagkus ang imo espada sa imo paa, O labing gamhanan, upod ang imo himaya kag pagkahalangdon.
4 Kag sa imo pagkahalangdon magsakay ka sing madinalag-on tungod sang kamatuoran kag kalulo kag pagkamatarong; kag ang imo tuo nga kamot magatudlo sa imo sang makahaladlok nga mga butang.
5 Ang imo mga baslay matalom sa tagipusuon sang mga kaaway sang hari; nga sa diin ang katawhan nagakahulog sa idalom mo.
6 Ang imo trono, O Dios, wala sing katapusan: ang setro sang imo ginharian isa ka matarong nga setro.
7 Ginahigugma mo ang pagkamatarong kag ginakaugtan ang kalautan: busa ang Dios, nga imo Dios, naghaplas sa imo sang lana sang kalipay labaw sa imo mga kaupdanan.
8 Ang tanan mo nga mga panapton nagapahamot sang mira, kag aloe, kag kasia, gikan sa mga palasyo nga marfil, nga sa sini nagpasadya sila sa imo.
9 Ang mga anak nga babayi sang mga hari nalakip sa imo dungganon nga mga babayi: sa imo tuo nagatindog ang rayna nga nagasuksok sang bulawan sang Ofir.
10 Pamati, O anak nga babayi, kag binagbinaga, kag ilingling ang imo dulunggan; kalimti man ang imo kaugalingon nga katawohan, kag ang panimalay sang imo amay;
11 Gani ang hari magahandum sing daku sang imo katahom: kay sia ang imo Ginuo; kag simbaha sia.
12 Kag ang anak nga babayi sang Tiro magaabot didto nga may dulot; bisan ang mga manggaranon sa katawohan magapangabay sang imo kahamuot.
13 Ang anak nga babayi sang hari matahom gid sa sulod: ang iya panapton puno sing bulawan.
14 Dalhon sia sa hari nga may panapton nga binadal: ang mga birhen nga iya mga kaupdanan nga nagasunod sa iya pagadalhon sa imo.
15 Upod ang kalipay kag kasadya dalhon sila: magasulod sila sa palasyo sang hari.
16 Sa baylo sang imo mga amay amo ang imo mga anak nga himuon mo nga mga prinsipe sa bug-os nga duta.
17 Himuon ko nga madumduman ang imo ngalan sa tanan nga kaliwatan: busa ang katawohan magadayaw sa imo sa walay katubtuban.